Солтүстік Қазақстан облысы әкімдігінің мәліметінше, өңірде Қазақстандағы ең ірі әрі технологиялық тұрғыдан жабдықталған саңырауқұлақ фермаларының бірі пайдалануға берілді. Жоба «Qyzyljar» арнайы экономикалық аймағында Қазақстан Республикасы Үкіметінің қолдауымен және Ауыл шаруашылығы министрлігінің қаржыландыруымен жүзеге асырылды.
Соңғы жылдары Солтүстік Қазақстан облысындағы инвестиция көлемі екі есеге артты. Инвестициялық жобаларды іске асыруға жергілікті кәсіпкерлер де белсенді түрде қатысуда. Жоба СҚО тәжірибесін тарату бағдарламасы аясында іске асырылып, өңірдің өңдеу өнеркәсібін дамытуға бағытталған.
Жобаның жалпы инвестиция көлемі шамамен 11,3 млрд теңгені құрайды. Кәсіпорын жылына 2 400 тоннаға дейін саңырауқұлақ өнімін өсіру және өңдеуді жоспарлап отыр. Жобаны іске асыру жаңа жұмыс орындарын құруға, ішкі нарықта отандық өнім үлесін арттыруға және импортты алмастыруға мүмкіндік береді.
Алдағы уақытта жылына 4 000 тоннаға дейін компост өндіретін зауытты іске қосу, сондай-ақ саңырауқұлақ фермасының өндірістік қуатын жылына 4 800 тоннаға дейін ұлғайту көзделген.